بـ عباية سودا وطرحة وزيرة التضامن واقفة بتشتري فراخ قدام محل في سوق شعبي.. مشهد غريب جدا مش كدا.. ودا لأننا اكيد متعودين إن الوزير قاعد في مكتبة جوه وزارته “في التكيف” زي ما مبيقولوا

بس مايا مرسي معملتش كدا وقررت تنزل تتسوق زي أي ست مصري وتلبس عباية سمرا عشان محدش يعرف إنها وزيرة مش بس كدا دي راحت قدام محل فراخ وقالتله هات يابني 2 كيلو بانية

طبعا صاحب المحل لقى واحدة داخلة تطلب منه الكمية دي قالها اتفضلى يا استاذة وجابلها كرسي وقعدت عليه وهنا جتلها فرصة إنها تتفرج على كل الستات اللي جايين يشتروا فراخ منه ودا كان اختبار حقيقي مش مجرد تقرير هتطلبه من موظفينها وتستناه يجي على ورق

لكن المفاجأة إن الوزيرة اتصمت من اللي شافته اللي جاية تطلب هياكل فراخ عشان تقدر تأكل عيالها واللي واقف يحسب فلوسه عشان يشتري ربع كيلوا بانية واللي بيحاول يعدل وزن عشان الفلوس اللي معاه متكفيش واللي بيشتري كبد وأوانص وبس لأنه ميقدرش على تمن الفراخ

الوزيرة رجعت وزارتها وهي مهمومة وقالت جملة اختصرت المشهد كله وهي «الإنسان الجائع لا يمكن تمكينه».

ومن اللحظة د الوزيرة حولت سياسة الوزارة من فكرة مساعدات موسمية أو شنط غذائية في مواسم معينة لـ مفهوم أوسع للأمن الغذائي وإنه جزء من الأمن القومي.

الطرح كان مفاجئ حتى لفريق العمل نفسه، لأن الوزيرة طول الوقت كانت ضد فكرة المساعدات المباشرة، ومؤمنة إن التمكين هو الحل لكن لما الواقع بيقول إن في ناس مش قادرة تجيب تمنه وجبتها الأساسية في رمضان وعشان كدا الوزيرة قررت تراجع المعادلة وتعدلها